tarasingh
Administrator Dr. Srimati Tara Singh









उगाळतो मी तुझ्या स्मृतींचे चंदन अजून सुद्धा!

 

 

 

उगाळतो मी तुझ्या स्मृतींचे चंदन अजून सुद्धा!
तुझीच मूर्ती मनात करते नर्तन अजून सुद्धा!!

 

तुझे नि माझे प्रेम पाहिले लक्ष लक्ष ता-यांनी;
हरेक तारा लवून करतो वंदन अजून सुद्धा!

 

फूल फूल दरवळू लागले तुझ्या अधर स्पर्शांनी;
हुळहुळते प्राणांत तरूच्या चुंबन अजून सुद्धा!

 

कुठून आले पंखांमध्ये बळ इतके उडण्याचे?
मला तोलते तुझे रेशमी बंधन अजून सुद्धा!

 

रुणझुणणारी तुझी पैंजणे हृदयामध्ये रुतली;
युगे लोटली तरी चालले स्पंदन अजून सुद्धा!

 

चराचराची सतार सांगा, कुणी छेडली आहे?
अनाहताचे ऎकू येते गुंजन अजून सुद्धा!

 

 

-------प्रा.सतीश देवपूरकर

 

 

 

HTML Comment Box is loading comments...